YOT jahkečoahkkin: Yleisrádios ii oaččo dahkat politihkkema gaskaoami

22.3.2023

Ylen ohjelmatyöntekijät ry (YOT) lea fuolas maŋimus áiggiid gevvon ságastallamis Yleisradio ruhtadeamis. Iešguđetlágan Yle bušeahtta čuohppanlisttut leat fas boahtán ovdan, vaikko Yle ruhtadeamis čuohppan ii seasttálii stáhta goluid.

Yle ruhtadeapmi lea riikabeivviid mearrádusain ordnejuvvon nu, ahte dan čogget vearuin, iige nu, ahte dat fuolahuvvo stáhta bušeahtas. Loahpaloahpas ruhtadeamis mearridit riikabeaivvit parlamentáralaččat. Ylen ohjelmatyöntekijät oaidná, ahte čuohppanlisttuid joraheapmi lea dušše politihkken riikaradiofitnodagain.

Dat ferte nohkat. Yle bargit leat váiban dasa, ahte sin bargosajit leat mielde almmolaš garra ságastallamis, masa laktásit maid boasttoipmárdusat ja juobe giellásat.

Go Yle ruhtadanmálle nuppástedje lei dieđus riska, ahte Yle ruhtadeapmi sáhttalii gártat iešguđetlágan ođasmahttinjurdagiid vuollái dan mielde, makkár bellodat dahje ideologiija goasge Suomas lea válddis. 

Dána lea juo dihto mielas dáhpáhuvvan, go bálkkádási ja goasttádusaid loktaneapmái dárkkuhuvvon indeaksabajideapmi lea bissehuvvon jagiin 2015-2018.

Ná ii sáhte leahkit. Riikaradiofitnodat galgá bastit seailluhit iežas iehčanasvuođa ja sorjjasmeahttunvuođa iešguđet áiggiid politihkkalas linjáin fuolatkeahttá. Jus ruhtadanvuođu einnosteapmi lea eahpesihkaris vuođu alde, dat hehtte riikkaidgaskasaš gilvobirrasis doaibmi álbmotlaš riikaradiofitnodaga boahttevuođa plánema.

Yle lea guovddášoassin álbmotlaš fuolahussihkkarvuođas. Yleisradioi ferte dáhkidit doarvái resurssaid bálvalit buohkaid nu guovlolaččat go riikaviidosaččat sin ekonomalaš sajis fuolatkeahttá. Yle lea mearkkašahtti dahje juobe áidna dieđihankanála máŋgga vehádahkii, ovdamearka dihte ruoŧa- ja sámegielat ja maiddái seavagielat olbmuide.

Almmolašvuođas ovdanbuktojuvvon čuohppamat sáhttet dagahit vearrámus dilis garra bargosajiid geahpedeami, go Yles bargoveahkagolut leat sullii bealli buot goluin.

Jagi 2021 doaibmačilgehusa ja ruhtadoalloloahpadeami vuođul dušše indeaksabajideamis luohpan guovtti válgabádjái dárkkuhivččii min árvvoštallama mielde lagabui 100 olbmo eretcealkima juohke jagi.

Yle jáhkkimis gárttašii geahpedit fálaldagas ja juobe heaittihit rádio- ja/dahje tv-kanálaid. Das šaddi máŋggageardásaš váikkuhusat čuozale kultuvra- ja dáiddasuorgái ja Yle ovttasbargoguimmiid dego buvttadanfitnodagaid ekonomiijai ja návccaide fállat barggu. Juo dál máŋggat sisdoalut, dego ovdamearkan valáštallamis mearkkašahtti mearri lea gávppálaškanálaid duohken.

Ylen ohjelmatyöntekijät dubme garrasit ovdanbuktojuvvon čuohppanevttohusaid. 

Dat eai leat dušše dárbbašmeahttumat, muhto maid vásttuheamit áiggis, goas friija dieđujuohkima ja sátnefriijavuođa fallehit iešguđetguovlluin máilmmi, maiddái ránnjáriikkaš Ruoššas.